හිටපු නාවික හමුදාපති වසන්ත කරන්නාගොඩ අල්ලස් කොමිසමෙන් අත්අඩංගුවට

හිටපු නාවික හමුදාපතිවරයෙකු වන අද්මිරාල් ඔෆ් ද ෆ්ලීට් වසන්ත කරන්නාගොඩ මහතා අල්ලස් හෝ දූෂණ චෝදනා විමර්ශන කොමිෂන් සභාවේ විමර්ශන නිලධාරීන් විසින් අද (3) අත්අඩංගුවට ගනු ලැබ තිබේ.

අල්ලස් කොමිසම නිකුත් කළ නිල මාධ්‍ය නිවේදනයට අනුව අද පෙරවරු 10.05 ට පමණ කොමිෂන් සභා පරිශ්‍රයේදීම මෙම අත්අඩංගුවට ගැනීම සිදුකර ඇත.

මීට පෙරද අල්ලස් කොමිසම හමුවේ පෙනී සිටින ලෙස කරන්නාගොඩ මහතාට කැඳවීම් කර තිබූ නමුත්, තමා අසනීප තත්ත්වයෙන් පසුවන බව පවසමින් ඔහු කොමිසම හමුවේ පෙනී සිටියේ නැත.

එල්ල වී ඇති චෝදනා

2006 වර්ෂයේදී ශ්‍රී ලංකා නාවික හමුදාව වෙත විධායක අංශය සඳහා ශිෂ්‍ය භට නිලධාරීන් බඳවා ගැනීමේදී, ඒ සඳහා නියමිත සුදුසුකම් සපුරා නොතිබූ යෝෂිත රාජපක්ෂ මහතාව විධායක අංශයේ ශිෂ්‍ය භට නිලධාරියෙකු වශයෙන් බඳවා ගැනීමට කටයුතු කිරීම කරන්නාගොඩ මහතාට එරෙහිව ඇති ප්‍රධාන චෝදනාවකි.

මීට අමතරව එවකට පැවති ක්‍රමවේදයට පරිබාහිරව රජයේ මුදල් වැය කරමින් ඔහුව බ්‍රිතාන්‍ය රාජකීය නාවික විද්‍යාලයේ පුහුණු පාඨමාලාවක් සඳහා සහභාගී කරවීමට අවස්ථාව සලසා දීම තුළින් 'දූෂණය' නමැති වරද සිදු කිරීමේ චෝදනාව ද ඔහුට එල්ල වී තිබේ.

ඉදිරි නීතිමය පියවර

අත්අඩංගුවට ගනු ලැබූ සැකකාර හිටපු නාවික හමුදාපති වසන්ත කරන්නාගොඩ මහතා කොළඹ ප්‍රධාන මහේස්ත්‍රාත් අධිකරණය වෙත ඉදිරිපත් කිරීමට නියමිත බව අල්ලස් හෝ දූෂණ චෝදනා විමර්ශන කොමිෂන් සභාවේ මාධ්‍ය ඒකකය වැඩිදුරටත් සඳහන් කරයි.

මෙම සිද්ධියටම අදාළව ඉකුත් ජූනි මස 17 වන දින අල්ලස් කොමිසම හමුවේ ප්‍රකාශයක් ලබා දීමට පැමිණි අවස්ථාවේදී යෝෂිත රාජපක්ෂ මහතා ද අත්අඩංගුවට පත් වූ අතර පසුව ඔහු අධිකරණය මගින් රුපියල් ලක්ෂ 50 බැගින් වූ ශරීර ඇප තුනක් මත මුදා හැරීමට නියෝග කෙරිණි.