ශ්‍රී ලංකාවේ නව ඇමරිකානු තානාපතිවරයා ලෙස එරික් මේයර් මහතා නිල වශයෙන් දිවුරුම් දී ඇති අතර ඒ අනුව කොළඹ පිහිටි ඔහුගේ නව රාජ්‍යතාන්ත්‍රික සේවා කටයුතු නිල වශයෙන් ආරම්භ වේ.
පසුගිය ජනවාරි මාසයේදී හිටපු තානාපතිනී ජූලි චන්ග් මහත්මියගේ සේවා කාලය අවසන් වීමෙන් පසුව පුරප්පාඩුව පැවති තනතුර සඳහා මෙලෙස එරික් මේයර් මහතා පත් කර තිබේ.
නව තානාපතිවරයා පැමිණෙන තෙක් ශ්‍රී ලංකාවේ ඇමරිකානු තානාපති කාර්යාලයේ නියෝජ්‍ය තානාපති ජේන් හොවෙල් මහත්මිය තාවකාලික තානාපතිවරිය ලෙස කටයුතු කළාය.
දිවුරුම් දීමේ උත්සවය
ඇමරිකානු නියෝජ්‍ය රාජ්‍ය ලේකම් ලැන්ඩා මහතාගේ ප්‍රධානත්වයෙන් පැවති දිවුරුම් දීමේ උත්සවයෙන් අනතුරුව, අමෙරිකානු රාජ්‍ය දෙපාර්තමේන්තුවේ දකුණු සහ මධ්‍යම ආසියානු කටයුතු කාර්යාංශය විසින් නව තානාපතිවරයා වෙත සිය උණුසුම් සුබ පැතුම් එක් කරනු ලැබීය.
ශ්‍රී ලංකාවේ පිහිටි ඇමරිකානු තානාපති කාර්යාලයද එරික් මේයර් මහතා සාදරයෙන් පිළිගෙන ඇති අතර "එක්සත් ජනපදය සහ ශ්‍රී ලංකාව අතර පවතින සබඳතා තවදුරටත් ශක්තිමත් කරමින්, පොදු අරමුණු සහ ප්‍රමුඛතාවයන් ඉදිරියට ගෙන යාම සඳහා ඔහුගේ නායකත්වය යටතේ කටයුතු කිරීමට අපි බලාපොරොත්තු වෙමු" යනුවෙන් නිවේදනයක්ද නිකුත් කරමින් ඔවුන් ඒ බව සඳහන් කර සිටියි.
පළපුරුදු රාජ්‍ය තාන්ත්‍රිකයෙක්
ඇමරිකානු ජ්‍යෙෂ්ඨ විදේශ සේවයේ ප්‍රබල රාජ්‍ය තාන්ත්‍රිකයෙකු වන එරික් මේයර් මහතා, දකුණු සහ මධ්‍යම ආසියානු කටයුතු පිළිබඳ පුළුල් අත්දැකීම් ඇති නිලධාරියෙකි.
තානාපතිවරයා ලෙස පත්වීමට පෙර ඔහු දකුණු සහ මධ්‍යම ආසියානු කටයුතු කාර්යාංශයේ ජ්‍යෙෂ්ඨ කාර්යාංශ නිලධාරියා ලෙස කටයුතු කර ඇත.
කැලෙෆෝනියා විශ්වවිද්‍යාලයේ සහ ජෝර්ජ්ටවුන් විශ්වවිද්‍යාලයේ උපාධිධාරියෙකු වන මේයර් මහතා, අමෙරිකානු රාජ්‍ය දෙපාර්තමේන්තුව තුළ තනතුරු රැසක් හොබවමින් දීර්ඝ පළපුරුද්දක් ලබා තිබේ.
ධුර කාලයේ ප්‍රමුඛතාවයන්
නව තානාපතිවරයාගේ ධුර කාලය තුළ ද්විපාර්ශ්වික සහයෝගීතාව ගැඹුරු කිරීම මෙන්ම වොෂින්ටන් සහ කොළඹ අතර පොදු අරමුණු සහ ප්‍රමුඛතා ඉදිරියට ගෙනයාම ප්‍රධාන අවධානයට ලක්වනු ඇත.
විශේෂයෙන්ම ආර්ථික සහයෝගීතාව, කලාපීය ආරක්ෂාව, යහපාලනය සහ සංවර්ධනය ඇතුළු විවිධ ක්ෂේත්‍ර සම්බන්ධයෙන් ඇමරිකාව සහ ශ්‍රී ලංකාව අතර පවතින සබඳතා තවදුරටත් වර්ධනය කර ගැනීම සඳහා නව තානාපතිවරයා සමග සමීපව කටයුතු කිරීමට බලාපොරොත්තු වන බව අමෙරිකානු තානාපති කාර්යාලය වැඩිදුරටත් පවසයි.
Comments
Moderated before publishing. Your email stays private.