ශ්‍රී ලංකා මහ බැංකුවේ මුදල් ප්‍රතිපත්ති මණ්ඩලය ඊයේ (29) පැවති රැස්වීමේදී එක්දින ප්‍රතිපත්ති පොලී අනුපාතය හෙවත් OPR, දැනට පවතින 8.75% මට්ටමේම වෙනස් නොකර පවත්වා ගැනීමට තීරණය කර තිබේ.
දේශීය හා ගෝලීය ආර්ථික තත්ත්වයන් මෙන්ම ඉදිරි ආර්ථික දැක්මද සැලකිල්ලට ගනිමින් මෙම තීරණය ගත් බව ශ්‍රී ලංකා මහ බැංකුව සඳහන් කරයි.
අවධානය යොමු වූ ආර්ථික සාධක
2026 මැයි මාසයේදී ක්‍රියාත්මක කළ දැඩි මුදල් ප්‍රතිපත්ති ක්‍රියාමාර්ගවල බලපෑම මෙන්ම මැදපෙරදිග වර්ධනය වන භූ දේශපාලනික ආතතීන් සහ එල්නිනෝ තත්ත්වයන් හේතුවෙන් ඇතිවිය හැකි අවදානම් සම්බන්ධයෙන්ද මුදල් ප්‍රතිපත්ති මණ්ඩලය මෙහිදී අවධානය යොමු කර ඇත.
කෙසේ වෙතත් 2026 වසරේ පළමු අර්ධයේදී ශ්‍රී ලංකා ආර්ථිකය 4.7%ක සැබෑ වර්ධනයක් වාර්තා කරමින් අඛණ්ඩ ඔරොත්තු දීමේ හැකියාවක් පෙන්නුම් කර ඇති බව මහ බැංකුව පෙන්වා දෙයි.
උද්ධමනය සහ ඉදිරි අපේක්ෂා
මේ අතර බලශක්ති මිල ඉහළ යාමේ බලපෑම ආර්ථිකයේ විවිධ අංශ වෙත සම්ප්‍රේෂණය වීම හේතුවෙන් 2026 අගෝස්තු මාසයේදී මෙරට ප්‍රධාන උද්ධමනය වාර්ෂික පදනම මත 8% දක්වා ඉහළ ගොස් තිබේ.
එම උද්ධමනය 2027 වසරේ පළමු කාර්තුව දක්වා ඉහළ තනි ඉලක්කම් මට්ටමක පැවතීමෙන් අනතුරුව, 5%ක ඉලක්කය වෙත ක්‍රමයෙන් පහළ යනු ඇතැයි අපේක්ෂා කෙරේ.
විදේශ සංචිත ඉහළ යාම
මේ අතර 2026 අගෝස්තු අවසානය වන විට මෙරට දළ නිල විදේශ සංචිත ප්‍රමාණය ඇමෙරිකානු ඩොලර් බිලියන 6.9ක් දක්වා ඉහළ ගොස් ඇති බව මහ බැංකුව සඳහන් කරයි.
ශ්‍රී ලංකා මහ බැංකුව විසින් සිදුකළ ශුද්ධ විදේශ විනිමය මිලදී ගැනීම්ද මෙලෙස සංචිත ප්‍රමාණය ඉහළ යාමට ප්‍රධාන වශයෙන් දායක වී තිබේ.
Comments
Moderated before publishing. Your email stays private.