මෙරට සියලුම ඔලිම්පික් ක්‍රීඩා පාලනය කරන ශ්‍රී ලංකා ජාතික ඔලිම්පික් කමිටුවේ නිලධාරි මණ්ඩලය තෝරා පත් කර ගැනීමේ නිලවරණය අප්‍රේල් මස 25 වැනිදා පැවැත්වීමට නියමිතය.
වත්මන් සභාපති සුරේෂ් සුබ්‍රමනියම් මහතා සිය ධුර කාලයන් දෙක සම්පූර්ණ කිරීමත් සමඟ, වසර අටකට පසු ජාතික ඔලිම්පික් කමිටුවේ නායකත්වයේ වෙනසක් මෙම නිලවරණයේදී දැකගත හැකි වනු ඇත.
ක්‍රීඩා සම්මේලන සහ සංගම් 25 ක් නියෝජනය කරමින් නිලධාරීන් 34 දෙනෙකු 12 දෙනෙකුගෙන් යුත් විධායක කමිටුවට පත්වීම සඳහා නාම යෝජනා භාර දී තිබේ.
පසුබිම
වසර 21 ක් පුරා එම ධුරයේ කටයුතු කළ හිටපු සභාපති හේමසිරි ප්‍රනාන්දු මහතාගෙන් පසුව, සුබ්‍රමනියම් මහතා 2018 වසරේදී ජාතික ඔලිම්පික් කමිටුවේ සභාපතිවරයා ලෙස තේරී පත් විය.
සුබ්‍රමනියම් මහතාගේ ධුර කාලය ආරම්භ වීමත් සමඟ ජාතික ඔලිම්පික් කමිටුවේ පාලනය සම්බන්ධයෙන් වෙනසක් ඇති වූ අතර, මීට පෙර ඉවත් කර තිබූ නිලධාරීන්ගේ ධුර කාල සීමාවන් නැවත පැනවීමක්ද සිදු විය.
කෙසේ වෙතත් ඔහුගේ ධුර කාලය තුළ විවිධ අර්බුදද මතු වූ අතර ගෝලීය වශයෙන් ඔලිම්පික් ක්‍රීඩා සහ ඒ හරහා ජාතික ඔලිම්පික් කමිටුව පාලනය කරන ජාත්‍යන්තර ඔලිම්පික් කමිටුවේ ආචාරධර්ම කමිටුවක් විසින් සිදු කරන ලද පරීක්ෂණයකින් පසු හිටපු ප්‍රධාන ලේකම් මැක්ස්වෙල් ද සිල්වා මහතාට වසර පහක තහනමක් පැනවීමද සිදු කෙරිණ.
නිලවරණ ක්‍රියාවලිය
මෑතකදී ඇති වූ මතභේදාත්මක තත්ත්වයන්ගෙන් පසුව, ජාතික ඔලිම්පික් කමිටුව අධීක්ෂණය කරන ජාත්‍යන්තර ඔලිම්පික් කමිටුව සහ ආසියානු ඔලිම්පික් කවුන්සිලය, ශ්‍රී ලංකාව සිය නිලවරණය අනිවාර්යයෙන්ම පැවැත්විය යුතු බවට අවධාරණය කළේය.
අප්‍රේල් මාසය දක්වා නාම යෝජනා භාරගැනුණු අතර, එහිදී භාණ්ඩාගාරික තනතුර සඳහා නාම යෝජනා දී තිබූ ශ්‍රී ලංකා පැසිපන්දු සංගමයේ සභාපති වරුන් අජිත් ජයකුමාර් මහතාගේ නාමයෝජනාව පමණක් ප්‍රතික්ෂේප කිරීමට නිලවරණ කමිටුව පියවර ගත්තේය.
මෙවර සභාපති ධුරය සඳහා අපේක්ෂකයින් පස් දෙනෙකු තරග වදින නමුත්, ශ්‍රී ලංකා පාපන්දු සම්මේලනයේ සභාපති ජස්වර් උමාර් සහ ශ්‍රී ලංකා ඉලක්කයට වෙඩි තැබීමේ සම්මේලනයේ සභාපති ශිරාන්ත පීරිස් යන මහත්වරුන් ප්‍රධාන තරගකරුවන් දෙදෙනා ලෙස සැලකේ.
මෙවර නිලවරණයේදී ජාතික ක්‍රීඩා සම්මේලන සහ සංගම් 29 කට ඡන්දය ප්‍රකාශ කිරීමේ අයිතිය හිමිව ඇති අතර, ඔවුන්ට එක් ඡන්දය බැගින් හිමිවේ. ක්‍රීඩක කමිටුවට පමණක් ඡන්ද දෙකක් ප්‍රකාශ කිරීමේ අවස්ථාව හිමිව තිබේ.
ඒ අනුව මුළු ඡන්ද ප්‍රමාණය 31 ක් වන අතර, ඉන් ඡන්ද 16 ක් ලබා ගන්නා අපේක්ෂකයාට ඉදිරි වසර හතර සඳහා ජාතික ඔලිම්පික් කමිටුවේ නායකත්වය හිමිවනු ඇත.
ශ්‍රී ලංකා ක්‍රිකට් ආයතනයට පළමු වරට ජාතික ඔලිම්පික් කමිටුවේ සාමාජිකත්වය හිමිව තිබුණද, මෙවර නිලවරණයේදී ඔවුන්ට ඡන්ද අයිතිය හිමි නොවේ. ඊට හේතුව වන්නේ සාමාජිකත්වය ලබා ගන්නා නව ජාතික ක්‍රීඩා සංගමයක් අවම වශයෙන් වසරක නිරීක්ෂණ කාලයක් සම්පූර්ණ කළ යුතු වීමයි.
නිලවරණ මෙහෙයුම් කමිටුවේ සභාපතිවරයා ලෙස විශ්‍රාමික ශ්‍රේෂ්ඨාධිකරණ විනිසුරු කේ.ටී. චිත්‍රසිරි මහතා කටයුතු කරයි.
Comments
Moderated before publishing. Your email stays private.