යෝෂිත සහ ඩේසි ෆොරස්ට්ට එරෙහි මුදල් විශුද්ධිකරණ නඩුව අගෝස්තු 31 කැඳවීමට නියෝග

මුදල් විශුද්ධිකරණය වැළැක්වීමේ පනත යටතේ හිටපු ජනාධිපති මහින්ද රාජපක්ෂ මහතාගේ පුත් යෝෂිත රාජපක්ෂ සහ ඔහුගේ මිත්තණිය වන ඩේසි ෆොරස්ට් යන මහත්ම මහත්මීන්ට එරෙහිව නීතිපතිවරයා ගොනු කර ඇති නඩුව, පූර්ව නඩු විභාග සම්මන්ත්‍රණය සඳහා ලබන අගෝස්තු මස 31 වැනිදා කැඳවන ලෙස කොළඹ මහාධිකරණය නියම කළේය.

මෙම නඩුකරය ඊයේ (16) කොළඹ මහාධිකරණ විනිසුරු රශ්මි සිංගප්පුලි මහතා ඉදිරියේ කැඳවනු ලැබූ අවස්ථාවේදී මෙම නියෝගය නිකුත් කෙරුණි.

පැමිණිල්ලේ සංශෝධන

මෙහිදී පැමිණිල්ල වෙනුවෙන් පෙනී සිටි රජයේ නීතිඥ ඔස්වල්ඩ් පෙරේරා මහතා අධිකරණය හමුවේ කරුණු දක්වමින් මෙම නඩුකරය පූර්ව නඩු විභාග සම්මන්ත්‍රණය සඳහා දිනයක් නියම කරන ලෙස ඉල්ලා සිටියේය.

එහිදී රජයේ නීතිඥවරයා වැඩිදුරටත් සඳහන් කළේ නඩුවේ දෙවැනි විත්තිකාරිය වන ඩේසි ෆොරස්ට් මහත්මිය සම්බන්ධයෙන් පැමිණිල්ලේ ස්ථාවරය එදිනට අධිකරණයට දැනුම් දීමට අපේක්ෂා කරන බවය.

මීට අමතරව අදාළ අධිචෝදනා පත්‍රයට සිදු කිරීමට නියමිත සංශෝධන පිළිබඳවද එදිනට කටයුතු කරන බව රජයේ නීතිඥවරයා අධිකරණය හමුවේ පැවසීය.

මිලියන 59ක චෝදනාවක්

අයථා ලෙස උපයා ගත් රුපියල් මිලියන 59කට ආසන්න මුදලක් බැංකු ගිණුම්වල තැන්පත් කිරීම තුළින් මුදල් විශුද්ධීකරණය වැළැක්වීමේ පනත යටතේ දණ්ඩනීය වරදක් සිදු කර ඇති බවට චෝදනා කරමින් නීතිපතිවරයා විසින් යෝෂිත රාජපක්ෂ සහ ඩේසි ෆොරස්ට් යන විත්තිකරුවන්ට එරෙහිව මෙම නඩුව පවරා තිබේ.

ඊයේ ඉදිරිපත් වූ කරුණු කාරණා සලකා බැලූ මහාධිකරණ විනිසුරුවරයා, නඩුව ලබන අගෝස්තු මස 31 වැනිදා නැවත කැඳවීමට තීරණය කළේය.