ශ්‍රී ලංකික රේසිං ධාවක යෙවාන් ඩේවිඩ් 2027 FIA ෆෝමියුලා 3 ශූරතාවලිය සඳහා ප්‍රකට 'වෑන් ඇමර්ස්ෆෝර්ට් රේසිං' කණ්ඩායම සමඟ එක්වන බව එම කණ්ඩායම නිල වශයෙන් නිවේදනය කර තිබේ.
2026 ෆෝමියුලා 3 ශූරතාවලියේදී තමන් නියෝජනය කළ 'AIX රේසිං' කණ්ඩායමෙන් ඉවත් වෙමින් ඩේවිඩ් මෙම නව පියවර තබා ඇති අතර මෙම මාසය අගදී බාසිලෝනා නුවරදී පැවැත්වෙන තරගයෙන් පසු ඔහු සිය නව කණ්ඩායම සමඟ වැඩ කටයුතු ආරම්භ කිරීමට නියමිතය.
තරග 10 කින් සමන්විත වන 2027 ෆෝමියුලා 3 ශූරතාවලිය ලබන වසරේ 2027 මාර්තු මාසයේ බහරේනයේදී ආරම්භ වීමට නියමිතව ඇත.
පසුගිය තරග වාරයේ දැක්වූ දස්කම්
මෙම වසරේ (2026) පැවති ෆෝමියුලා 3 තරග වාරයේදී ක්‍රීඩකයින් 35 දෙනෙකු අතරින් 18 වැනි ස්ථානය හිමිකර ගැනීමට ඩේවිඩ් සමත් විය.
එහිදී සමස්තයක් ලෙස ප්‍රසාද ලකුණු 35 ක් රැස් කර ගැනීමටත්, සිල්වර්ස්ටෝන් නුවර පැවැති ස්ප්‍රින්ට් තරගයේදී විශිෂ්ට ලෙස තෙවැනි ස්ථානය දිනා ගැනීමටත් ඔහුට හැකි විය.
මෙම කණ්ඩායම් අතර මාරුවීම ඩේවිඩ් ලද තවත් සුවිශේෂී ඉදිරි පිම්මක් වන අතර ඔහු අලුතින් එක්වන 'වෑන් ඇමර්ස්ෆෝර්ට්' කණ්ඩායම මෙවර කණ්ඩායම් ශ්‍රේණිගත කිරීම්වල පස්වැනි ස්ථානය දිනා ගැනීමට සමත් විය.
ඊට සාපේක්ෂව 2026 වාරයේදී ඔහු නියෝජනය කළ AIX රේසිං කණ්ඩායම කණ්ඩායම් ශූරතාවලියේ අවසන් ස්ථානයට පත්විය.
Comments
Moderated before publishing. Your email stays private.