මුතුරාජවෙල සිට කටුනායකට ගුවන්යානා ඉන්ධන නළ මාර්ගයක් එලීමේ වැඩකටයුතු ඇරඹේ

මුතුරාජවෙල සිට කටුනායක දක්වා ගුවන්යානා ඉන්ධන රැගෙන යන නව නළ මාර්ගයක් එලීමේ කටයුතු ජනාධිපතිවරයාගේ ප්‍රධානත්වයෙන් අද (02) ආරම්භ කිරීමට නියමිතව තිබේ.

කිලෝමීටර් 21 ක දිගකින් යුක්ත වන මෙම නළ මාර්ග ව්‍යාපෘතියට සමගාමීව, ඝන මීටර් 40,000 ක ධාරිතාවකින් යුත් තෙල් ගබඩා ටැංකි තුනක් ඉදිකිරීමේ කටයුතුද අද දිනයේදී ආරම්භ කෙරේ.

කැබිනට් අනුමැතිය සහ ව්‍යාපෘති පිරිවැය

මුතුරාජවෙල සිට කටුනායක බණ්ඩාරනායක ජාත්‍යන්තර ගුවන්තොටුපොළ දක්වා ගුවන් යානා ඉන්ධන ප්‍රවාහනය කිරීම සඳහා අවශ්‍ය යටිතල පහසුකම් සංවර්ධනය කිරීමේ ව්‍යාපෘතියේ කොන්ත්‍රාත්තුව ඇමෙරිකානු ඩොලර් මිලියන 40.84 ක සහ ශ්‍රී ලංකා රුපියල් මිලියන 8,548.75 ක මුදලකට පිරිනැමීම සඳහා පසුගිය 21 වැනිදා රැස්වූ අමාත්‍ය මණ්ඩලයේ අනුමැතිය හිමිවිය.

ව්‍යාපෘතියෙන් ලැබෙන වාසි

මෙම සෘජු නළ මාර්ගය ස්ථාපිත වීමත් සමඟ, අතරමැදි බාධාවලින් තොරව, ආරක්ෂිතව සහ අඩු මෙහෙයුම් පිරිවැයකින් ගුවන්තොටුපොළ වෙත අඛණ්ඩව ගුවන් ඉන්ධන සැපයීමේ හැකියාව රටට හිමිවන බව බලශක්ති අංශ පෙන්වා දෙයි.

එමෙන්ම ගුවන්තොටුපොළ තුළ ඉන්ධන සංචිත රඳවා ගැනීමේ ධාරිතාව පුළුල් වීම හරහා ජාත්‍යන්තර ගුවන් සේවා ක්ෂේත්‍රය තුළ කටුනායක ගුවන්තොටුපොළේ විශ්වාසනීයත්වය තවදුරටත් ඉහළ යනු ඇතැයිද අපේක්ෂා කෙරේ.