බැඳුම්කර වංචාවට මහාධිකරණ දුන් තීන්දුව ශ්‍රේෂ්ඨාධිකරණය අවලංගු කරයි

වසර 2016 දී සිදුවූ මහ බැංකු බැඳුම්කර නිකුත් කිරීමේ සිදුවීමට (බැඳුම්කර වංචාවට) අදාළව චූදිතයන් දස දෙනාම නිදහස් කරමින් 2021 වසරේදී මහාධිකරණය ලබා දී තිබූ තීන්දුව ශ්‍රේෂ්ඨාධිකරණය අද (1) දින අවලංගු කළේය.

ඒ අනුව පොදු දේපළ පනත යටතේ මෙම නඩු පැවරීම් ඉදිරියට පවත්වාගෙන යා යුතු බවට ශ්‍රේෂ්ඨාධිකරණය නියෝග කළේය. අගවිනිසුරු ප්‍රීති පද්මන් සූරසේන මහතා ඇතුළු පස්දෙනෙකුගෙන් යුත් විනිසුරු මඩුල්ලක සාමාජිකයෙකු වූ ශ්‍රේෂ්ඨාධිකරණ විනිසුරු මහින්ද සමයවර්ධන මහතා, මෙම තීන්දුව ප්‍රකාශයට පත් කළේය.

මින් පෙර මහාධිකරණ ත්‍රිපුද්ගල විනිසුරු මඩුල්ල විසින් පොදු දේපළ පනත යටතේ නඩු පැවරිය නොහැකි බවට තීන්දු කරනු ලැබ තිබූ 'පර්පෙචුවල් ට්‍රෙෂරීස්' සමාගම, හිටපු මුදල් අමාත්‍ය රවි කරුණානායක සහ හිටපු මහ බැංකු අධිපති අර්ජුන මහේන්ද්‍රන් යන මහත්වරු මෙම නඩුවේ චූදිතයන් අතර වෙති.

පසුබිම

විශේෂ මහාධිකරණ ත්‍රිපුද්ගල විනිසුරු මඩුල්ලක් විසින් 2021 වසරේ දෙසැම්බර් මස මෙම නඩුවේ බරපතලම චෝදනාවලින් චූදිතයන් දස දෙනාම නිදහස් කරන ලදී.

'පර්පෙචුවල් ට්‍රෙෂරීස්' යනු සමාගමක් මිස ස්වාභාවික පුද්ගලයෙකු නොවන බැවින් පොදු දේපළට එරෙහි වැරදි පිළිබඳ පනත යටතේ ඊට එරෙහිව නඩු පැවරිය නොහැකි බව විත්ති පාර්ශවය තර්ක කළේය.

සමාගමට එරෙහිව චෝදනා ගොනු කළ නොහැකි නම් ඊට සම්බන්ධ පුද්ගලයන්ට එරෙහි චෝදනාද ඉවත් කළ යුතු බව ඔවුන්ගේ ස්ථාවරය විය. ඒ අනුව මහාධිකරණ විනිසුරු මඩුල්ල එම තර්කය පිළිගනිමින් චූදිතයන් නිදහස් කිරීමට පියවර ගත්තේය.

මේ පිළිබඳව නීතිපතිවරයා අභියාචනාධිකරණයට ඉදිරිපත් කළ අභියාචනය, එය විභාග කිරීමට තමන්ට බලයක් නොමැති බව පවසමින් ප්‍රතික්ෂේප විය.

වසර 2022 අප්‍රේල් මස නීතිපතිවරයා මෙම නඩුව සම්පූර්ණ විභාගයක් සඳහා ශ්‍රේෂ්ඨාධිකරණය හමුවට රැගෙන යාමට අවසර ඉල්ලමින් අයදුම්පතක් ගොනු කළේය.

වසර 2023 දී මහාධිකරණ නඩු කටයුතු අත්හිටුවමින් ශ්‍රේෂ්ඨාධිකරණය අතුරු තහනම් නියෝගයක් නිකුත් කළ අතර අභියාචනය විභාග කිරීම සඳහා නිල වශයෙන් අවසර ලබා දුන්නේය.

වසර ගණනාවක ප්‍රමාදයන්ගෙන් පසුව 2023 වසරේදී පත් කරන ලද විනිසුරු මඩුල්ලට වඩා වෙනස් පස්දෙනෙකුගෙන් යුත් ශ්‍රේෂ්ඨාධිකරණ විනිසුරු මඩුල්ලක් හමුවේ මෙම නඩුව අවසන් වශයෙන් විවාදයට ගැණුනු අතර එහි තීන්දුව අද දිනයේදී ප්‍රකාශයට පත් විය.

බැඳුම්කර වංචාව යනු කුමක්ද?

බැඳුම්කර වංචාව ලෙස හැඳින්වෙන්නේ 2015 සහ 2016 වර්ෂවල ශ්‍රී ලංකා මහ බැංකුව විසින් සිදු කරන ලද භාණ්ඩාගාර බැඳුම්කර වෙන්දේසිවලදී සිදු වූවා යැයි කියනු ලබන අක්‍රමිකතා සමූහයකි.

මේ පිළිබඳව විමර්ශනය කළ ජනාධිපති පරීක්ෂණ කොමිෂන් සභාව සොයාගත්තේ මෙම 2015 සහ 2016 වෙන්දේසි හේතුවෙන් රජයට රුපියල් බිලියන 11 ක පමණ පාඩුවක් සිදුව ඇති බවයි.

මෙහි ප්‍රධාන සැකය එල්ල වූයේ එවකට මහ බැංකු අධිපති අර්ජුන මහේන්ද්‍රන් මහතාගේ බෑණනුවන් වන අර්ජුන් ඇලෝසියස්ට අයත් බලපත්‍රලාභී ප්‍රාථමික බැඳුම්කර අලෙවිකරණ සමාගමක් වන 'පර්පෙචුවල් ට්‍රෙෂරීස්' සමාගම වෙතය. මෙය ශ්‍රී ලංකා ඉතිහාසයේ සිදු වූ විශාලතම මූල්‍ය වංචාවක් ලෙස සැලකේ.