දෙහිවල සත්වෝද්‍යානයේ මෑතකදී උපත ලැබූ නයිල් හිපපොටේමස් පැටවා නිල වශයෙන් ‘මෝමෝ’ ලෙස නම් කර තිබේ.
ලෝක ළමා දිනයට සමගාමීව ඊයේ (01) දෙහිවල සත්වෝද්‍යානයේ පැවති විශේෂ උත්සවයකදී මෙම නම නිල වශයෙන් ප්‍රකාශයට පත් කෙරිණි.
ළමුන්ගේ ඉහළ සහභාගීත්වයක්
ජාතික සත්වෝද්‍යාන දෙපාර්තමේන්තුව සඳහන් කළේ පැටවාට නමක් තෝරා ගැනීම සඳහා පැවැත්වූ විශේෂ තරගයට දරුවන්ගෙන් ඉහළ සහභාගීත්වයක් ලැබුණු අතර එහිදී නම් 1,000 කට ආසන්න සංඛ්‍යාවක් ඉදිරිපත් වූ බවය.
සත්වෝද්‍යාන නිලධාරීන්ගෙන් සමන්විත කමිටුවක් විසින් ‘මෝමෝ’ ජයග්‍රාහී නම ලෙස තෝරාගෙන ඇති අතර එම නම යෝජනා කර තිබුණේ අවන්දා තමාරි නම් දැරිය විසිනි.
ජයග්‍රාහී නම ඉදිරිපත් කිරීම වෙනුවෙන් අවන්දා තමාරි දැරියට විශේෂ ත්‍යාග පිරිනැමීම පරිසර නියෝජ්‍ය අමාත්‍ය ඇන්ටන් ජයකොඩි මහතාගේ සහභාගීත්වයෙන් පැවති මෙම උත්සවයේදී සිදු කෙරිණි.
මෙම අවස්ථාවට පරිසර අමාත්‍යාංශයේ සහ ජාතික සත්වෝද්‍යාන දෙපාර්තමේන්තුවේ නිලධාරීන් පිරිසක්ද එක්ව සිටියහ.
කාර්ය මණ්ඩලයට ස්තූතිය සහ මහජනතාවට ආරාධනා
මේ අතර මෝමෝගේ සෞඛ්‍යය සහ යහපැවැත්ම වෙනුවෙන් අඛණ්ඩව කැපවී කටයුතු කරන සත්ව පාලකයින්, පශු වෛද්‍ය නිලධාරීන් ඇතුළු සත්වෝද්‍යාන කාර්ය මණ්ඩලයටද දෙපාර්තමේන්තුව සිය ස්තූතිය පළ කර ඇත.
මෝමෝ කෙරෙහි දැක්වූ උනන්දුව සහ ආදරය වෙනුවෙන් දරුවන්ට සහ මහජනතාවට ස්තූතිය පළ කර සිටින ජාතික සත්වෝද්‍යාන දෙපාර්තමේන්තුව, එහි නවතම සාමාජිකයා දැකබලා ගැනීම සඳහා දෙහිවල සත්වෝද්‍යානය වෙත පැමිණෙන ලෙස පවුල් සහ තරුණ අමුත්තන්ට ආරාධනා කර සිටියි.
Comments
Moderated before publishing. Your email stays private.