ත්‍රෛනිකායික මහා සංඝරත්නය සහ ජනපති අනුර අතර විශේෂ හමුවක් අද

අති පූජනීය ත්‍රෛනිකායික මහානායක ස්වාමීන් වහන්සේලා නියෝජනය කරන මහා සංඝරත්නය සහ ජනාධිපති අනුර කුමාර දිසානායක මහතා අතර විශේෂ සාකච්ඡාවක් අද (08) පස්වරු 1.00 ට ජනාධිපති ලේකම් කාර්යාලයේදී පැවැත්වීමට නියමිතව තිබේ.

අධිකරණ තීන්දුවකට අනුව බන්ධනාගාර ගත කෙරුණු පූජ්‍ය ගලගොඩඅත්තේ ඥානසාර හිමියන්ව ගිහි ඇඳුමින් සැරසී අධිකරණයට ඉදිරිපත් කිරීම සම්බන්ධයෙන් ත්‍රෛනිකායික මහානායක හිමිවරුන් විසින් බන්ධනාගාර කොමසාරිස් ජෙනරාල්වරයා වෙත ලිපියක් යොමු කිරීමට අදාළව මෙම සාකච්ඡාව පැවැත්වෙන බව රජයේ ප්‍රවෘත්ති දෙපාර්තමේන්තුව නිවේදනය කරයි.

මහානාහිමිවරුන්ගේ කනස්සල්ල සහ ශාසනික පාර්ශවය

ඥානසාර හිමියන්ව එලෙස ගිහි ඇඳුමින් අධිකරණය හමුවට ඉදිරිපත් කිරීමට බන්ධනාගාර දෙපාර්තමේන්තුව කටයුතු කළ ආකාරය පිළිබඳව තමන් වහන්සේලා දැඩි කනස්සල්ලට හා විමතියට පත් වූ බව ඊයේ (07) යැවූ ලිපිය මගින් මහානාහිමිවරුන් අවධාරණය කර තිබිණ.

භික්ෂුවකගේ චීවරය ඉවත් කිරීම හෝ පැවිදිභාවය අහෝසි කිරීම හුදෙක් රාජ්‍ය පරිපාලනමය හෝ බන්ධනාගාර රෙගුලාසියකට සීමා වූවක් නොවන අතර එය මහා සංඝරත්නය සතු ශාසනික කාර්යයක් බව උන්වහන්සේලා පෙන්වා දෙති.

ඥානසාර හිමියන්ගේ භික්ෂූත්වය අහෝසි වන පාරාජිකා ආපත්තියකට පත්ව ඇති බවට හෝ චීවරයෙන් නෙරපිය යුතු බවට අදාළ සංඝ සභාව මගින් කිසිදු තීරණයක් ගෙන නොමැති පසුබිමක, බන්ධනාගාර පරිපාලනය විසින් මෙවැනි පියවරක් ගැනීම බෞද්ධ සම්ප්‍රදායට සිදුවන හානියක් මෙන්ම සමස්ත සම්බුද්ධ ශාසනයේ පැවැත්මටද අභියෝගයක් බව අදාළ ලිපියේ දැක්වේ.

බන්ධනාගාර පාලනාධිකාරියෙන් කළ ඉල්ලීම

අධිකරණය මගින් වරදකරු කරනු ලබන යම් භික්ෂුවකගේ භික්ෂූත්වයට අදාළ කරුණුවලදී එකී භික්ෂුව අයත් වන නිකාය පාර්ශවයේ නිර්දේශ සහ නියමයන් මත පිහිටා බන්ධනාගාර දෙපාර්තමේන්තුව කටයුතු කිරීම සුදුසු බව මහානාහිමිවරුන් වැඩිදුරටත් සඳහන් කර සිටිති.

එබැවින් අධිකරණ තීන්දුවට හා බන්ධනාගාර නීතිවලට බාධාවක් නොවන පරිදි, ඥානසාර හිමියන් බන්ධනාගාරගතව සිටින කාලසීමාවේදී උන්වහන්සේගේ භික්ෂූත්වයට අගතියක් නොවන ලෙස කටයුතු කිරීමට අවකාශ සලසා දෙන ලෙසත්, ඉදිරි අධිකරණ කටයුතුවලදී අඛණ්ඩව භික්ෂුභාවයෙන් පෙනී සිටීමට අවශ්‍ය පරිපාලනමය පහසුකම් සලසා දෙන ලෙසත් මහානාහිමිවරුන් බන්ධනාගාර කොමසාරිස් ජෙනරාල්වරයාගෙන් ඉල්ලා සිටිති.