කපිල චන්ද්‍රසේන මහතා නිවසක මියගොස් සිටියදී හමුවෙයි

එයාර්බස් ගනුදෙනුවකදී ඇමරිකානු ඩොලර් මිලියන 2 ක අල්ලසක් ලබාගත් බවට චෝදනා එල්ල වී සිටි ශ්‍රී ලන්කන් ගුවන් සේවයේ හිටපු ප්‍රධාන විධායක නිලධාරී කපිල චන්ද්‍රසේන මහතා අද (8) දින කොල්ලුපිටියේ පිහිටි නිවසකදී මියගොස් සිටියදී හමුවී තිබේ.

අල්ලස් නඩුවකට අදාළව පසුගිය මාර්තු මාසයේදී අත්අඩංගුවට ගත් චන්ද්‍රසේන මහතා, පසුගිය අඟහරුවාදා (5) ඇප මත මුදා හැර තිබුණි.

කෙසේ වෙතත් පුද්ගලයන් දෙදෙනෙකු ව්‍යාජ ලෙස ඇපකරුවන් ලෙස ඉදිරිපත් කිරීමට උත්සාහ කර ඇති බව අනාවරණය වීමත් සමඟ කොළඹ ප්‍රධාන මහේස්ත්‍රාත්වරයා බ්‍රහස්පතින්දා (7) දිනයේදී එම ඇප නියෝගය අවලංගු කර ඔහු අත්අඩංගුවට ගැනීමට වාරණයක් නිකුත් කර තිබූ බව වාර්තා විය.

අප දන්නා කරුණු

ශ්‍රී ලන්කන් ගුවන් සේවයේ ප්‍රධාන විධායක නිලධාරියා ලෙස සහ එයාර්බස් යානා මිලදී ගැනීමේ ප්‍රසම්පාදන කමිටුවේ ප්‍රධානියා ලෙස කටයුතු කරමින් සිටියදී, අල්ලස් ලබා ගත් බවට එල්ල වූ චෝදනා මත මාර්තු මස 13 වැනිදා අල්ලස් හෝ දූෂණ චෝදනා විමර්ශන කොමිෂන් සභාව විසින් ඔහුව අත්අඩංගුවට ගන්නා ලදී.

අනතුරුව, රුපියල් ලක්ෂ 5 ක මුදල් ඇපයක් සහ රුපියල් මිලියන 10 බැගින් වූ ශරීර ඇප තුනක් මත කොළඹ ප්‍රධාන මහේස්ත්‍රාත් අධිකරණය විසින් පසුගිය අඟහරුවාදා (5) ඔහුට ඇප ලබා දෙන ලදී. නමුත් ඇප කොන්දේසි උල්ලංඝනය කරමින් නුසුදුසු ඇපකරුවන් දෙදෙනෙකු ඉදිරිපත් කර ඇති බව පවසමින් අල්ලස් කොමිසම බ්‍රහස්පතින්දා (7) අධිකරණය හමුවේ කරුණු දක්වමින් එම ඇපය අවලංගු කරන ලෙස ඉල්ලා සිටියේය.

අනතුරුව එම පුද්ගලයන් දෙදෙනා අත්අඩංගුවට ගනු ලැබූ අතර චන්ද්‍රසේන මහතා වෙනුවෙන් ඇපකරුවන් ලෙස පෙනී සිටීම සඳහා ඔවුන් දෙදෙනාට රුපියල් 15,000 බැගින් ලැබී ඇති බව පොලිසිය අධිකරණයට දන්වා තිබුණි. ඔවුන් කපිල චන්ද්‍රසේන මහතාව පෞද්ගලිකව හඳුනන අය නොවන බවත්, ඇප ක්‍රියාවලියේදී සැක සහිත ලේඛන ඉදිරිපත් කර ඇති බවත් අනාවරණය විය.

එයාර්බස් අල්ලස

මෙම අල්ලස් චෝදනාව එල්ල වී ඇත්තේ 2013 වසරේදී ශ්‍රී ලන්කන් ගුවන් සේවය විසින් ප්‍රංශයේ එයාර්බස් සමාගමෙන් ගුවන් යානා 10 ක් (ඒ330 යානා හයක් සහ ඒ350 යානා හතරක්) මිලදී ගැනීමට අදාළව සිදුකළ ගනුදෙනවක් සම්බන්ධයෙනි.

එක්සත් රාජධානියේ බරපතල වංචා විමර්ශන කාර්යාලය විසින් සිදු කරන ලද විමර්ශනයකින් අනතුරුව මෙම ගනුදෙනුව සම්බන්ධයෙන් එයාර්බස් සමාගම ඇමරිකානු ඩොලර් මිලියන 16.84 ක අල්ලස් මුදලක් ගෙවා ඇති බව 2020 වසරේ බ්‍රිතාන්‍ය අධිකරණයකදී තහවුරු විය.

ඉන් ඇමරිකානු ඩොලර් මිලියන 2 ක් බැර කර තිබුණේ හිටපු ප්‍රධාන විධායක නිලධාරියාගේ බිරිඳ වන ප්‍රියංකා නියෝමාලි විජේනායකට අයත් බෲනායි රාජ්‍යයේ ලියාපදිංචි සමාගමක ගිණුමකටය. බ්‍රිතාන්‍ය අධිකරණයේ අනාවරණයන්ගෙන් පසුව චන්ද්‍රසේන සහ ඔහුගේ බිරිඳ අත්අඩංගුවට ගෙන පසුව ඇප මත මුදා හැර තිබුණි.

ලැබුණු මුදල් එම සමාගමට අයත් සිංගප්පූරු ගිණුමක සිට චන්ද්‍රසේන මහතාගේ ඕස්ට්‍රේලියාවේ පෞද්ගලික ගිණුමකට සහ තවත් ගිණුම් කිහිපයකට අවස්ථා ගණනාවකදී හුවමාරු කර ඇති බව ද අනාවරණය විය.

අත්අඩංගුවට ගැනීමෙන් පසුව අල්ලස් කොමිසම අධිකරණයට දන්වා සිටියේ, තමන් සිදුකළ විමර්ශන වලදී හිටපු ජනාධිපති මහින්ද රාජපක්ෂ මහතාට රුපියල් මිලියන 60 ක අල්ලසක් ගෙවා ඇති බවට චන්ද්‍රසේන මහතා පාපොච්චාරණය කර ඇති බවය.

හිටපු කථානායක චමල් රාජපක්ෂ මහතාගේ බාල පුත්‍රයා සහ මහින්ද රාජපක්ෂ මහතාගේ බෑණනුවන් වන ශාමින්ද රාජපක්ෂද මෙම නඩුවේ සැකකරුවෙකු ලෙස නම් කර ඇත. පසුගිය මාර්තු මාසයේදී මෙම අල්ලස් සිද්ධිය සම්බන්ධයෙන් අධිකරණය හමුවේ පෙනී නොසිටීම හේතුවෙන් ශාමින්ද රාජපක්ෂ සහ ප්‍රියංකා නියෝමාලි විජේනායක අත්අඩංගුවට ගැනීම සඳහා විවෘත වාරණ නිකුත් කර තිබුණි.