අන්තරේ සිසුන් මල්වානේ නිවසෙන් ඉවත් වෙයි

මල්වාන ප්‍රදේශයේ පිහිටි දේපළක් බලහත්කාරයෙන් අත්පත් කරගෙන සිටි විශ්වවිද්‍යාල ශිෂ්‍ය ක්‍රියාකාරීන් කණ්ඩායමක් එම ඉඩම විශ්වවිද්‍යාල ප්‍රතිපාදන කොමිෂන් සභාවට පැවරීමට අග්‍රාමාත්‍ය හරිනි අමරසූරිය මහත්මිය එකඟ වීමෙන් පසු එම පරිශ්‍රයෙන් ඉවත් වීමට එකඟ වී තිබේ.

අද දින (18) පැවැති සාකච්ඡාවකින් අනතුරුව දැනට දොම්පේ ප්‍රාදේශීය ලේකම් කාර්යාලය භාරයේ පවතින මෙම ඉඩම විශ්වවිද්‍යාල ප්‍රතිපාදන කොමිෂන් සභාවට පැවරීමට අග්‍රාමාත්‍යවරිය එකඟ වූ බව අන්තර් විශ්වවිද්‍යාලයීය ශිෂ්‍ය බලමණ්ඩලයේ කැඳවුම්කරු සසිඳු පෙරේරා කියා සිටියේය.

මෙම පරිශ්‍රයේ අයිතිය සම්බන්ධයෙන් දැඩි කතාබහක් නිර්මාණය වී තිබුණේ එය හිටපු පාර්ලිමේන්තු මන්ත්‍රී බැසිල් රාජපක්ෂ මහතාට අයත් එකක් බවට එල්ල වූ චෝදනා සමඟිනි. කෙසේ වෙතත් ඔහු එම චෝදනා සහ ඊට ඇති සම්බන්ධතාවන් ප්‍රතික්ෂේප කර ඇත.

පසුබිම

"මහජන බදු මුදලින් සොරකම් කරන ලද" දේපළ මහජන අයිතියට පවරන ලෙස ඉල්ලමින් අන්තර් විශ්වවිද්‍යාලයීය ශිෂ්‍ය කණ්ඩායමක් මැයි 14 වැනිදා පස්වරුවේ මල්වාන නිවසට ඇතුළු වූහ.

විශ්වවිද්‍යාල සහ උසස් අධ්‍යාපන ආයතන තුළ පවතින ඉඩකඩ මදිකම හේතුවෙන් විශ්වවිද්‍යාල සිසුන් දැඩි ගැටලුවලට මුහුණ දී සිටින බව ද ඔවුහු ප්‍රකාශ කළහ. තම ගැටලුවලට විසඳුම් ලබාගැනීමේ එක් පියවරක් ලෙස මෙම පරිශ්‍රය අත්පත් කරගත් බව අන්තර් විශ්වවිද්‍යාලයීය ශිෂ්‍ය බලමණ්ඩලයේ සාමාජිකයෝ පැවසූහ.

සාකච්ඡා

අන්තර් විශ්වවිද්‍යාලයීය ශිෂ්‍ය බලමණ්ඩලය විසින් මතු කරන ලද කරුණු සම්බන්ධයෙන් පසුගිය සෙනසුරාදා (16) ඔවුන්ගේ නියෝජිතයන් සහ අධ්‍යාපන අමාත්‍යාංශයේ නිලධාරීන් අතර සාකච්ඡාවක් පැවැත්වුණද එය අසාර්ථක වූ අතර ඒ හේතුවෙන් ඔවුන් දිගින් දිගටම එම නිවසේ රැඳී සිටියහ.

කෙසේ වෙතත් මෙම සිදුවීම අග්‍රාමාත්‍ය හරිනි අමරසූරිය මහත්මියගේ අවධානයට යොමුවීමත් සමඟ, සිසුන්ගේ ඉල්ලීම් පිළිබඳ සාකච්ඡාවක් අද (18) අග්‍රාමාත්‍යවරිය සමඟ පැවැත්වීමට නියමිත බව අධ්‍යාපන හා උසස් අධ්‍යාපන අමාත්‍යාංශය ඊයේ (17) නිවේදනයක් නිකුත් කරමින් කියා සිටියේය.

අද දින අග්‍රාමාත්‍ය කාර්යාලයේ පැවැති හමුවේදී අදාළ ඉඩම සහ නිවස විශ්වවිද්‍යාල ප්‍රතිපාදන කොමිෂන් සභාවට පැවරීමට අග්‍රාමාත්‍යවරිය එකඟ වීමත් සමඟ තත්ත්වය සමථයකට පත්ව ඇති බව වාර්තා වේ.

බැසිල්ගේ අයිතිය පිළිබඳ චෝදනා

මීට පෙර රුපියල් මිලියන 250 ක් ලෙස ඇස්තමේන්තු කර තිබූ මෙම මල්වාන දේපළ බැසිල් රාජපක්ෂ මහතා වෙත සම්බන්ධ කර තිබුණද, රාජපක්ෂ මහතා එම ප්‍රකාශ ප්‍රතික්ෂේප කර තිබේ.

මල්වාන ප්‍රදේශයේ මන්දිරයක් ඉදිකිරීම සඳහා රජයේ මුදල් අවභාවිත කළ බවට එල්ල වූ චෝදනාවලින් 2022 වසරේදී ඔහුව නිදොස් කොට නිදහස් කරනු ලැබීය.

ඊට නීත්‍යානුකූල අයිතිකරුවෙකු හඳුනා නොගැනීම හේතුවෙන් එම දේපළ රජයට පවරා ගන්නා ලදී.