XIV වැනි ලියෝ පාප්වහන්සේගේ පෙනහළු පිළිකා සැත්කම සාර්ථකයි

XIV වැනි ලියෝ පාප්වහන්සේගේ දකුණු පෙනහළේ තිබූ පිළිකා ගෙඩියක් ඉවත් කිරීමේ විශේෂ සැත්කම ඊයේ (13) සාර්ථකව සිදුකළ බව වතිකානුව නිල වශයෙන් නිවේදනය කර තිබේ.

කිසිදු සංකූලතාවයකින් තොරව මිනිත්තු 90 ක කාලයක් පුරා පැවැති මෙම සාර්ථක සැත්කමෙන් අනතුරුව, ශුද්ධෝත්තම පාප්වහන්සේ වැඩිදුර පරීක්ෂණ කිහිපයක් සඳහා යොමු කෙරෙනු ඇති බවද වතිකානුව වැඩිදුරටත් සඳහන් කළේය.

රෝහල්ගත කිරීම සහ වෛද්‍ය තීරණය

71 හැවිරිදි XIV වැනි ලියෝ පාප්වහන්සේ, සාමාන්‍ය වෛද්‍ය පරීක්ෂණයකදී ඉතා මුල් අවධියේදී හඳුනාගන්නා ලද කුඩා ගෙඩියක් පිළිබඳව ඉරිදා (11) දිනයේදී නිවේදනය කර තිබිණි.

ඒ අනුව අඟහරුවාදා දින උන්වහන්සේ රෝමයේ පිහිටි ජෙමෙලිරෝහලට ඇතුළත් කිරීමට පියවර ගැනුණි.

සැත්කමේ තොරතුරු සහ ඉදිරි නිරීක්ෂණ

සැත්කම සම්පූර්ණයෙන්ම සාර්ථක බව තහවුරු කරගැනීමේ අරමුණින්, වෛද්‍යවරුන් විසින් පාප්වහන්සේගේ දකුණු පෙනහළේ පහළ කොටස සම්පූර්ණයෙන්ම ඉවත් කිරීමට කටයුතු කර ඇත.

සැත්කම අතරතුර සිදුකරන ලද ජීව පරීක්ෂාවලදී, සැත්කමට පෙර පැවැති පරීක්ෂණවලින් සැක කළ පරිදිම එය 'පෙනහළු ඇඩිනොකාසිනෝමා' තත්ත්වය බව තහවුරු වී තිබේ.

'පෙනහළු ඇඩිනොකාසිනෝමා' යනු පෙනහළු පිළිකාවලදී බහුලව දක්නට ලැබෙන තත්ත්වයක් වන අතර උන්වහන්සේ ඉදිරියේදී අතිරේක පරීක්ෂණ සහ වෛද්‍ය නිරීක්ෂණයන්ට යොමු කිරීමට නියමිත බව වතිකානුව වැඩිදුරටත් කියා සිටියේය.