වකුගඩුව විකුණන බවට මුහුණුපොතේ පළවන දැන්වීම්ට නීතිමය ක්‍රියාමාර්ග

මුහුණුපොත (Facebook) සමාජ මාධ්‍ය ජාලය ඔස්සේ සිය වකුගඩුව විකිණීමට සූදානම් බව පවසමින් පළවන දැන්වීම් සංඛ්‍යාව මෑත කාලීනව ඉහළ ගොස් ඇති බව වාර්තා වනවා.

පසුගිය කාලසීමාව පුරා පවතී ආර්ථික පීඩනය සහ දැඩි ණය බර හේතුවෙන් බොහෝ පිරිසක් මෙවැනි අවදානම් සහගත තීරණ කරා යොමු වී ඇති බවයි නිරීක්ෂණය වන්නේ.

මෙම ක්‍රියාවලිය ශ්‍රී ලංකාවේ පවතින නීතියට අනුව සපුරා තහනම් සහ දඬුවම් ලැබිය හැකි වරදක් බව සෞඛ්‍ය අංශ මෙන්ම නීති අංශ පෙන්වා දී තිබෙනවා.

මෙම දැන්වීම් හරහා වකුගඩු ජාවාරම්කරුවන් ක්‍රියාත්මක වන බවට තොරතුරු අනාවරණය වී ඇති අතර, ඒ පිළිබඳව විමර්ශන ආරම්භ කර ඇති බව පොලිස් ආරංචි මාර්ග සඳහන් කර සිටිනවා.

වකුගඩු පරිත්‍යාග කිරීමක් (Organ Donation) සිදු කළ හැක්කේ දැඩි නියාමනයන් සහ සෞඛ්‍ය අමාත්‍යාංශයේ අනුමැතිය යටතේ පමණක් බවත්, මුදලට අවයව විකිණීම බරපතල වංචාවක් බවත් සෞඛ්‍ය බලධාරීන් පවසනවා.

මුදල් අවශ්‍යතා මත මෙවැනි අනාරක්ෂිත සහ නීති විරෝධී ක්‍රියාවලට හසුවී ඔබේ ජීවිතයත්, නිදහසත් අනතුරේ දමා නොගැනීමට ඔබත් වැඩි අවධානයක් යොමු කළ යුතු වනවා.