විජයදාසගේ පුත් රකිත, සජබ ආසන සංවිධායක චරිත අල්ලස් කොමිසමෙන් අත්අඩංගුවට

2023 වසරේදී පොලිස් භාරයේ පසුවූ සංවිධානාත්මක අපරාධකරුවෙකු ආරක්ෂා කර මුදා හැරීම සඳහා අල්ලස් ලබා ගැනීමේ චෝදනාව මත පුද්ගලයන් තිදෙනෙකු අත්අඩංගුවට ගත් බව අල්ලස් හෝ දූෂණ චෝදනා විමර්ශන කොමිෂන් සභාව පවසයි.

අල්ලස් කොමිසම අද (25) නිවේදනයක් නිකුත් කරමින් ප්‍රකාශ කළේ, "හරක් කටා" නමින් හැඳින්වෙන සංවිධානාත්මක අපරාධකරු වන නඳුන් චින්තක වික්‍රමරත්නගේ බිරිඳගෙන් රුපියල් මිලියන 500ක අල්ලසක් ඉල්ලා සිටීමේ චෝදනාව මත හිටපු අධිකරණ අමාත්‍ය විජයදාස රාජපක්ෂ මහතාගේ පුත්‍රයෙකු වන රකිත නිර්මල රාජපක්ෂ සහ සමගි ජන බලවේගයේ හොරණ ආසන සංවිධායක චරිත අබේසිංහ යන අය අත්අඩංගුවට ගත් බවය.

මීට අමතරව සිවිල් ගුවන් සේවා අධිකාරියේ සහ ශ්‍රී ලංකා ගුවන් තොටුපළ හා ගුවන් සේවා සමාගමේ හිටපු අධ්‍යක්ෂවරයෙකු වන අරුණ ශ්‍රී චතුරංග නැමැති තුන්වන පුද්ගලයෙකුද මෙහිදී අත්අඩංගුවට ගෙන තිබේ.

පසුබිම

මහා පරිමාණ මත්ද්‍රව්‍ය ජාවාරම් කිරීමේ චෝදනාවලට අදාළව අවශ්‍ය කර සිටි වික්‍රමරත්න (හරක් කටා) 2023 මාර්තු මාසයේදී මැඩගස්කරයේදී අත්අඩංගුවට පත් වූ අතර පසුව ඔහුව ශ්‍රී ලංකාවට පිටුවහල් කරනු ලැබීය.

අල්ලස් කොමිසම නිකුත් කළ නිවේදනයට අනුව සැකකරුවන් තිදෙනා විසින් ඩුබායිහි විසූ වික්‍රමරත්නගේ බිරිඳ වන මධුෂිකා මධුවන්තිගෙන් මුලින්ම රුපියල් මිලියන 500ක අල්ලස් මුදලක් ඉල්ලා ඇත.

පසුව ඔවුන් එම මුදල රුපියල් මිලියන 200 දක්වා අඩු කර ඇති අතර එහි අත්තිකාරම් මුදලක් ලෙස රුපියල් මිලියන 120ක් ලබාගෙන තිබේ.

එම අල්ලස් මුදලට හිලව් වන්නට වික්‍රමරත්නව ඝාතනය කිරීම වැළැක්වීම මගින් ඔහුගේ ජීවිතය ආරක්ෂා කර දීමටත්, ඔහුට එරෙහි රැඳවුම් නියෝග අවලංගු කර බූස්ස අධි ආරක්ෂිත බන්ධනාගාරයේ සිට වෙනත් බන්ධනාගාරයකට මාරු කර දීමටත්, දැනට පවතින විමර්ශන සහ අදාළ නීතිමය ක්‍රියාමාර්ගවලින් ඔහුව නිදහස් කර ගැනීමට පහසුකම් සලසා දීමටත් මෙම සැකකරුවන් පොරොන්දු වී ඇති බවට චෝදනා එල්ල වී ඇත.