දැනට රක්ෂිත බන්ධනාගාරගත කර සිටින පාර්ලිමේන්තු මන්ත්‍රී නාමල් රාජපක්ෂ මහතා වෙත විශේෂ ආරක්ෂාවක් සපයා ඇති අතර ඔහුට නිවසින් පිසූ ආහාර ලබා ගැනීමටද අවසර ලබාදී ඇත.
බන්ධනාගාර දෙපාර්තමේන්තුවේ මාධ්‍ය ප්‍රකාශක සෙනක පල්ලෙතැන්න මහතා උපුටා දක්වමින් වාර්තා සඳහන් කරන්නේ මන්ත්‍රීවරයා වෙනුවෙන් කළ ඉල්ලීම් සැලකිල්ලට ගනිමින් මෙම පහසුකම් සලසා ඇති බවය.
පසුගිය සිකුරාදා (4) කොළඹ මහේස්ත්‍රාත් අධිකරණය නිකුත් කළ නියෝගයකට අනුව නාමල් රාජපක්ෂ මහතා සැප්තැම්බර් 18 වැනිදා දක්වා රක්ෂිත බන්ධනාගාරගත කර සිටියි.
පසුබිම
ආන්දෝලනාත්මක ශ්‍රී ලංකන්-එයාර්බස් ගනුදෙනුවට අදාළව රුපියල් මිලියන 100 ක අල්ලස් මුදලක් ලබාගත් බවට වන චෝදනා මත පසුගිය සිකුරාදා අල්ලස් හෝ දූෂණ චෝදනා විමර්ශන කොමිෂන් සභාව මගින් රාජපක්ෂ මහතාව අත්අඩංගුවට ගන්නා ලදී.
ශ්‍රී ලංකන් ගුවන් සේවයේ හිටපු ප්‍රධාන විධායක නිලධාරී කපිල චන්ද්‍රසේන මහතාගේ බිරිඳ විසින් සිය සමාගමට එකී මුදල් හුවමාරු කිරීමෙන් අනතුරුව, තමන් එම අල්ලස් මුදල් රාජපක්ෂ මහතා වෙත ලබා දුන් බවට ව්‍යාපාරිකයෙකු විසින් කොමිසම හමුවේ දිවුරුම් පෙත්සමක් මගින් ප්‍රකාශ කර තිබුණි.
කෙසේ වෙතත් අදාළ අත්අඩංගුවට ගැනීම මෙම ව්‍යාපාරිකයාගේ ප්‍රකාශය මත පමණක් පදනම්ව සිදුකර ඇති බවට තර්ක කරන රාජපක්ෂ මහතාගේ නීතිඥයින්, එම ප්‍රකාශයේ විශ්වාසනීයත්වය සහ ස්ථාවර භාවය පිළිබඳව ප්‍රශ්න කර සිටී.
Comments
Moderated before publishing. Your email stays private.