පළාත් සභා මැතිවරණය පිළිබඳ පාර්ලිමේන්තු තේරීම් කාරක සභාව විපක්ෂ මන්ත්‍රීවරුන් 4ක් වර්ජනය කරති

පළාත් සභා මැතිවරණය පිළිබඳ පාර්ලිමේන්තු තේරීම් කාරක සභාවේ 10 වැනි රැස්වීම අද (10) විපක්ෂයේ මන්ත්‍රීවරුන් සිව්දෙනෙකු විසින් වර්ජනය කර තිබේ.

දීර්ඝ කාලයක් තිස්සේ කල් දමා ඇති පළාත් සභා මැතිවරණය පැවැත්වීම සඳහා අවශ්‍ය බැරෑරුම්භාවය සහ හදිසිභාවය තේරීම් කාරක සභාව විසින් පෙන්නුම් කිරීමට අසමත් වී ඇති බැවින් මෙම තීරණය ගත් බව වාර්තා වේ.

ඒ අනුව රංජිත් මද්දුම බණ්ඩාර, මනෝ ගනේෂන්, ෂානක්කියන් රාසමාණික්කම් සහ නිසාම් කාරියප්පර් යන විපක්ෂ මන්ත්‍රීවරුන් සිව්දෙනා මෙලෙස තේරීම් කාරක සභාවේ ක්‍රියාපටිපාටිය සම්බන්ධයෙන් දැඩි කනස්සල්ල පළ කර ඇත.

විපක්ෂ මන්ත්‍රීවරුන්ගේ මතය

අද පැවති රැස්වීමේදී විපක්ෂ මන්ත්‍රීවරුන් වෙනුවෙන් අදහස් දක්වමින් ෂානක්කියන් රාසමාණික්කම් මන්ත්‍රීවරයා සඳහන් කර ඇත්තේ, රැස්වීම් දහයක් පැවැත්වී තිබුණද පළාත් සභා මැතිවරණය පැවැත්වීම සම්බන්ධයෙන් අර්ථවත් ප්‍රගතියක් ලබා ගැනීමට නොහැකි වී ඇති බැවින්, මෙවැනි ක්‍රියාවලියකට තවදුරටත් සහාය දිය නොහැකි බවය.

මේ සම්බන්ධයෙන් නිවේදනයක් නිකුත් කරමින් රාසමාණික්කම් මන්ත්‍රීවරයා පෙන්වා දෙන්නේ මැතිවරණය පැවැත්වීම සඳහා ප්‍රායෝගික සහ නීතිමය විකල්ප දැනටමත් පවතින බවය.

• මැතිවරණ කොමිෂන් සභාවේ යෝජනාව: දැනට පවතින සමානුපාතික නියෝජන ක්‍රමය යටතේ පළාත් සභා මැතිවරණය පැවැත්විය හැකි ආකාරය පිළිබඳ පැහැදිලි යෝජනාවක් මැතිවරණ කොමිෂන් සභාව ඉදිරිපත් කර ඇති අතර ඊට කාන්තාවන් සඳහා සියයට 25% සහතික නියෝජනයක්ද ඇතුළත් වේ.

• පෞද්ගලික මන්ත්‍රී පනත් කෙටුම්පත: ෂානක්කියන් රාසමාණික්කම් මන්ත්‍රීවරයා විසින් ඉදිරිපත් කරන ලද පෞද්ගලික මන්ත්‍රී පනත් කෙටුම්පතක් දැනටමත් පාර්ලිමේන්තුවේ න්‍යාය පත්‍රයට ඇතුළත් කර ඇති අතර බහුතර එකඟතාව මත එය ඉදිරියට ගෙන යා හැකිය.

ඒ අනුව ක්‍රියාවලිය දිග්ගැස්සීම වෙනුවට දැන් අවශ්‍ය වන්නේ දේශපාලන තීරණයක් ගෙන මැතිවරණය පැවැත්වීම බව එම නිවේදනයේ සඳහන් වේ.

ප්‍රතිපත්ති ප්‍රකාශනයේ පොරොන්දු සහ ඉදිරි පියවර

ජාතික ජන බලවේගය සිය 2024 ජනාධිපතිවරණ ප්‍රතිපත්ති ප්‍රකාශනයේ 128 වැනි පිටුවේ, බලයට පත්වීමෙන් වසරක් ඇතුළත පළාත් සභා සහ පළාත් පාලන මැතිවරණ පැවැත්වීමට පොරොන්දු වී තිබූ බවද අදාළ නිවේදනය මඟින් පෙන්වා දෙයි.

පළාත් සභා වසර ගණනාවක් තිස්සේ මහජන නියෝජිතයන්ගෙන් තොරව පැවතීමෙන් ජනතාවට ඇති ප්‍රජාතන්ත්‍රවාදී අයිතිය අහිමි වී ඇති බවත්, එම තත්ත්වය පවත්වාගෙන යාමට ඉඩ දිය නොහැකි බවත් අවධාරණය කෙරේ.

එබැවින් පැහැදිලි කාල රාමුවක් සහිත ක්‍රියාමාර්ග රජය සහ තේරීම් කාරක සභාව විසින් වහාම ගත යුතු බවත්, බරපතළ දේශපාලන කැපවීමක් පෙන්නුම් කිරීමට අසමත් වන්නේ නම් විපක්ෂ මන්ත්‍රීවරුන් සිව්දෙනාට බරපතළ තීරණයක් ගැනීමට සිදුවනු ඇති බවත් වැඩිදුරටත් දක්වා ඇත.