දසුන් ශානකට පාකිස්තාන සුපර් ලීගයෙන් වසරක තහනමක්

ශ්‍රී ලංකා විස්සයි-20 ජාත්‍යන්තර ක්‍රිකට් කණ්ඩායමේ නායක දසුන් ශානකට පාකිස්තාන සුපර් ලීග් තරගාවලියට ක්‍රීඩා කිරීම වසරක කාලයක් සඳහා තහනම් කර තිබේ.

මෙම වසරේ පාකිස්තාන සුපර් ලීග් තරගාවලිය ආරම්භ වීමට සතියකටත් අඩු කාලයක් තිබියදී ශානක තරගාවලියෙන් ඉවත් වීමෙන් පසු, ලීගය සංවිධානය කරන පාකිස්තාන ක්‍රිකට් මණ්ඩලය විසින් සිදු කරන ලද සමාලෝචනයකින් අනතුරුව ඔහුට මෙම සම්බාධකය පනවා ඇත.

ඉන්පසුව ශානක මේ දිනවල පැවැත්වෙන ඉන්දීය ප්‍රිමියර් ලීග් තරගවලිය සඳහා රාජස්ථාන් රෝයල්ස් කණ්ඩායම සමඟ ගිවිසුම්ගත විය.

පසුබිම

පෙබරවාරි මාසයේ පැවති පාකිස්තාන සුපර් ලීග් ක්‍රීඩක වෙන්දේසියේදී ඇමරිකානු ඩොලර් 27,000 ක පමණ මුදලකට ලාහෝර් කලන්ඩර්ස් කණ්ඩායම විසින් ශානකව මිලදී ගන්නා ලදී.

ඉන් මසකට පසු, එනම් මාර්තු 21 වන දින ශානක එම තරගාවලියෙන් ඉවත් වූ අතර, ආබාධයකට ලක්වූ තුන්ඉරියව් ක්‍රීඩක සෑම් කරන් වෙනුවට පසුදින රාජස්ථාන් රෝයල්ස් කණ්ඩායම සමඟ ගිවිසුම්ගත විය.

රෝයල්ස් කණ්ඩායම වෙනුවෙන් ක්‍රීඩා කිරීමෙන් ශානක ඇමරිකානු ඩොලර් 214,000 ක් උපයා ගනු ඇතැයි අපේක්ෂා කෙරේ. කෙසේ වෙතත් රාජස්ථාන් කණ්ඩායම මෙතෙක් ක්‍රීඩා කර ඇති තරග හයෙන් කිසිවකට ඔහු ක්‍රීඩා කර නොමැත.

පාකිස්තාන ක්‍රිකට් මණ්ඩලයේ සමාලෝචනය

ශානකගේ ඉවත්වීමෙන් පසු, ක්‍රීඩකයා සහ ඔහු ගිවිසුම්ගතව සිටි ලාහෝර් කලන්ඩර්ස් කණ්ඩායම අතර ඇති වූ ගිවිසුම්ගත වර්ධනයන් පිළිබඳව පාකිස්තාන ක්‍රිකට් මණ්ඩලය විසින් පුළුල් සමාලෝචනයක් පවත්වන ලදී.

සමාලෝචනයෙන් පසු නිවේදනයක් නිකුත් කරමින් පාකිස්තාන ක්‍රිකට් මණ්ඩලය ප්‍රකාශ කළේ ශානක ඒකපාර්ශ්විකව තරගාවලියෙන් ඉවත්වීම "ක්‍රීඩක ලියාපදිංචි කිරීමේ නියමයන් සහ ත්‍රෛපාර්ශ්වික ගිවිසුම පැහැදිලිවම උල්ලංඝනය කිරීමක්" බවයි.

මෙම ඉවත්වීම "දැනට පවතින ගිවිසුම්ගත රාමුව තුළ පිළිගත් හේතූන් මත" සිදු කර නොමැති බවද පාකිස්තාන ක්‍රිකට් මණ්ඩලය සොයාගෙන ඇත.

සිය ඉවත්වීම සම්බන්ධයෙන් ශානක සිය කණගාටුව ප්‍රකාශ කර තිබුණද, පාකිස්තාන ක්‍රිකට් මණ්ඩලය ප්‍රකාශ කළේ "ලීගයේ අඛණ්ඩතාව සහ සුවිශේෂත්වය පවත්වා ගැනීම සඳහා මෙම ගිවිසුම් උල්ලංඝනය කිරීම් වලට එරෙහිව නියාමන ක්‍රියාමාර්ග ගැනීම අත්‍යවශ්‍ය වන" බවයි.

ඒ අනුව 2027 වසරේ පැවැත්වීමට නියමිත තරගාවලියේ මීළඟ අදියර සඳහා සහභාගී වීමට ශානක නුසුදුසු බව තීරණය කෙරිණි.

ශානකගේ ප්‍රකාශය

සිය කණගාටුව ප්‍රකාශ කරමින් ශානක කියා සිටියේ තමා ඉවත් වන අවස්ථාවේ වෙනත් කිසිදු තරගාවලියකට එක්වීමේ අදහසක් තමාට නොතිබූ බවයි.

"මා පාකිස්තාන සුපර් ලීග් තරගාවලියෙන් ඉවත් වන විට වෙනත් කිසිදු තරගාවලියකට සම්බන්ධ වීමේ අදහසක් මට නොතිබූ බව මා පැහැදිලි කළ යුතුයි. පාකිස්තාන ක්‍රිකට් ලෝලීන් කෙරෙහි මට ඉමහත් ගෞරවයක් ඇති අතර මා පාකිස්තානයේ ගත කළ කාලය ගැන සෑම විටම සතුටු වෙනවා," යැයි ශානක පැවසීය.

"පාකිස්තාන සුපර් ලීග් තරගාවලියෙන් ඉවත් වීමට මා ගත් තීරණය පිළිබඳව මා දැඩි සේ කණගාටු වන අතර පාකිස්තානයේ ජනතාවගෙන්, පාකිස්තාන සුපර් ලීග් ක්‍රීඩා ලෝලීන්ගෙන් සහ පුළුල් ක්‍රිකට් ප්‍රජාවගෙන් මාගේ අවංකවම සමාව අයදිනවා." යැයි ඔහු වැඩිදුරටත් ප්‍රකාශ කළේය.